ហេតុអ្វីបានជាជនជាតិបរទេសចូលចិត្តមកធ្វើការវិនិយោគនៅក្នុងប្រទេសកម្ពុជា?
ហេតុអ្វីបានជាជនជាតិបរទេសចូលចិត្តមកធ្វើការវិនិយោគនៅក្នុងប្រទេសកម្ពុជា?
យើងបានសង្កេតមើលសង្គមជាក់ស្តែងហើយថា ប៉ុន្មានឆ្នាំចុងក្រោយនេះពិតជាមានការហូរចូល
នូវវិនិយោគិនបរទេសជាច្រើន ទាំងប៉ែកអ៊ីរ៉ុប និងអាស៊ី ពិសេសវិនិយោគិនជនជាតិចិន។
ពួកគេបានវិនិយោគទៅលើវិស័យ កសិកម្ម អចលទ្រព្យ ឧស្សាហកម្ម បច្ចេកវិទ្យាជាដើម។
តើមានមូលហេតុអ្វីខ្លះ ដែលនាំឱ្យពួកគាត់មានការវិនិយោគមកលើកម្ពុជា?
បើតាមការមានប្រសាសន៍របស់លោក គីម ហ៊ាង ប្រធានសមាគមន៍អ្នកវាយតម្លៃផ្នែកអចលនទ្រព្យនៅកម្ពុជាបានមានប្រសាសន៍ថា
ដោយសារតែប្រទសកម្ពុជាមានកត្តាសំខាន់ៗដូចខាងក្រោមនេះទើបមានលំហូរនូវវិនិយោគិនទាំងនោះ
ហើយវាក៏ជាចម្រៀងដែលរូបលោកផ្ទាល់បានច្រៀងផងដែរ នៅពេលដែលគាត់ធ្វើដំណើរទៅក្រៅប្រទេសក្នុងកិច្ចប្រជុំនានា
៖
១.កត្តាភូមិសាស្ត្រៈ
ប្រទេសកម្ពុជា ជាប្រទេសមួយដែលជាដែនដីព្រះ ពោលគឺមិនធ្លាប់មានស្ថានភាពគ្រោះកាចអ្វីដែលធំដុំឡើយ។
ព្រោះតែប្រទេសកម្ពុជា មានសណ្ធានដីជារាងបាតខ្ទះ ពោលគឺការពារដោយភ្នំ។ ហេតុនេះហើយបានជាវិនិយោគិនមានចំណាប់អារម្មណ៍ជាខ្លាំងពិសេសគឺ
វិស័យអចលទ្រព្យ ព្រោះវាគ្មានផលប៉ះពាល់អ្វីឡើយក្នុងពេលដែលពួកគេបានសាងសង់រួច។
២.កត្តាប្រជាសាស្ត្រ
ប្រជាជនកម្ពុជា ជាប្រជាជនដែលពោរពេញទៅដោយកម្លាំង ពោល គឺមាន
៦៨% ដែលប្រហែលស្មើនឹង ១១លាននាក់ ស្ថិតក្នុងវ័យពលកម្ម។ ខណៈដែលប្រទេស កូរ៉េ
និងជប៉ុនកំពុងជួបនឹងបញ្ហាខ្វះពលកម្មនេះ។ កម្ពុជា មានប្រជាជនដែល ចេះជួយយកធុរៈគ្នា
និងឱ្យតម្លៃខ្ពស់ដល់ជនបរទេស(មិនដល់ថ្នាក់បរទេសនិយមទេ)។
៣.កត្តានយោបាយ
លោកបានបន្តទៀតថា កត្តានយោបាយរបស់ប្រទេសកម្ពុជា គឺមានលំនឹងល្អ
ដោយរូបលោកផ្ទាល់ក៏ជាអ្នកតាមដានរាល់ព័ត៌មានក្នុងនិង ក្រៅប្រទេសផងដែរ។
“ខ្ញុំសង្កេតឃើញថា ស្ថានភាពនយោបាយរបស់ប្រទេសកម្ពុជា គឺមានលក្ខណៈប្រសើរ
បើធៀបនឹងប្រទេសដទៃក្នុងពិភពលោក។” គាត់បានមានប្រសាសន៍។ លោកក៏បានបន្តទៀតថា
នៅក្នុងប្រទេសដែលកំពុងអភិវឌ្ឍន៍ គឺនយោបាយដឹកនាំសេដ្ឋកិច្ច រីឯប្រទេសដែលអភិវឌ្ឍន៍គឺ
សេដ្ឋកិច្ចដឹកនាំនយោបាយ។
៤.កត្តាអាកាសធាតុ
ជាប្រទេសដែលមានអាកាសធាតុថេរ ពោលគឺក្តៅបំផុតនៅចន្លោះ ៣៨
ដល់ ៤០ អង្សារសេ និងត្រជាក់បំផុតក្នុងចន្លោះ ១៦ ទៅ ១៨អង្សារសេ ដែលវាពិតជាមានលក្ខណៈខុសពីប្រទេសដទៃទៀតនៅក្នុងសកលលោក។
ហើយអាកាសធាតុនេះទៀតសោត ពិតជាមានអំណោយផលក្នុងការធ្វើកសិកម្មផងដែរ។
៥.លើកលែងចំពោះពន្ធនាំចេញ
មានការលើកលែងពន្ធ ឬយកតិចតួច ចំពោះការនាំចេញទៅបណ្តាប្រទេសមួយចំនួន។
មិនត្រឹមតែប៉ុណ្ណោះក៏មានការយកពន្ធតិចតួចផងដែរចំពោះការចំណេញ ដែលបានមកពីការវិនិយោគផងដែរ។
៦.កត្តាសេដ្ឋកិច្ច
កម្ពុជាមានសេដ្ឋកិច្ចរីកចម្រើន ជាងពីរទស្សវត្សន៍មកនេះ
ក្នុងសន្ទុះ ៧ភាគរយជារៀងរាល់ឆ្នាំថេរ។ ដែលវាបានផ្តល់ភាពទុកចិត្តយ៉ាងខ្លាំងពីសំណាក់វិនិយោគិន
ក្នុងការវាស់វែងនូវហានិភ័យផ្សេងៗ។
អរគុណសម្រាប់ការអាន!!!
Comments
Post a Comment