ការកំណត់ផែនការជីវិតក្នុងឆ្នាំ ២០១៩

ជិតឆ្លងឆ្នាំហើយ តើមានការកំណត់ផែនការប្រចាំឆ្នាំហើយឬនៅ? មែនហើយឆ្នាំ ២០១៩ ប្រាកដជាឆ្នាំដែលល្អជាងគេនៅក្នុងជីវិតរបស់យើង!!!
ការកំណត់ផែនការប្រចាំឆ្នាំគឺពិតជាសំខាន់ខ្លាំងណាស់ ដើម្បីកំណត់ភាពជោគជ័យនៅក្នុងជីវិតរបស់យើង។ លោក Anthony Robbins បាននិយាយថាភាពជោគជ័យ គឺជាការប្រែពីអ្វីដែលយើងមើលមិនឃើញនឹងភ្នែក ទៅជាអ្វីដែលយើងអាចមើលឃើញ ឬអាចនិយាយម្យ៉ាងទៀតបានថា គឺជាការកំណត់គោលដៅដែលយើងបានកំណត់ ហើយសម្រេចវាឱ្យបានសម្រេច។
ថ្ងៃនេះផេកយើង ខ្ញុំនាំជូនលោកអ្នកនូវវិធីនៃការកំណត់គោលដៅជីវិតដែលវាមាន ៣ ជំហានដូចខាងក្រោមៈ
១.ជំហានទី១៖ ចំណាយពេល ៦នាទីដើម្បីឱ្យខួរក្បាលរបស់អ្នកគិតពីអ្វីដែលយើងចង់សម្រេចវា ពីអ្វីដែលយើងចង់បង្កើត ចង់ធ្វើ និងចង់មានវាក្នុងរយៈពេល ២០ ឆ្នាំទៅខាងមុខទៀត។ សរសេរនៅលើក្រដាសរបស់អ្នកអំពីអ្វីៗទាំងនោះ ឱ្យលឿនតាមអ្វីដែលអាចធ្វើបាន។
២.ជំហានទី២៖ ឥឡូវត្រលប់ទៅកាន់គោលដៅរបស់យើងហើយត្រូវកំណត់រយៈពេលប៉ុន្មានខែ ប៉ុន្មានឆ្នាំដើម្បីសម្រេចវា។ ត្រូវកំណត់ពេលឱ្យមានភាពពិតប្រាកដក្នុងការសន្មតវា។ ឧទាហរណ៍អ្នកមិនអាចក្លាយជាជើងឯកផ្នែកកីឡាអូឡាំពិកក្នុងរយៈពេលមួយយប់នោះទេ។ ក្នុងដំណាក់កាលនេះអ្នកមានរយៈពេល ១នាទី កន្លះដើម្បីបំពេញជំហ៊ានមួយនេះ។
៣.ជំហានទី៣៖ រំលឹកអំពីអ្វីដែលអ្នកបានគ្រោងទុក។ ជ្រើសរើសគោលដៅដែលសំខាន់បំផុតចំនួន ៤ ហើយគោលដៅនោះអាចមានរយៈពេលត្រឹមតែមួយឆ្នាំប៉ុណ្ណោះ។ ហើយវាក៏ជាគោលដៅដែលធ្វើឱ្យអ្នករំភើបផងដែរ។ ចូរសរសេរជាទម្រង់កថាខណ្ឌ ហើយបកស្រាយពីវា ថាហេតុអ្វីបានជាយើងត្រូវសម្រេចវាក្នុងរយៈពេល ១២ខែខាងមុខនេះ។ ក្នុងជំហាននេះអ្នកត្រូវចំណាយពេល ១៥ ទៅ ២០ នាទី។

ឥឡូវនេះអ្នកមានឱកាសចែករំលែកវាទៅកាន់ មិត្តភក្តិ សមាជិកគ្រួសារ ក៏ដូចជាបុគ្គលណាដែលអ្នកស្គាល់ ដែលអ្នកអាចទុកចិត្តបាន។ ប្រសិនបើមិនមានទេ អ្នកគ្រាន់តែស្រែកឱ្យលឺៗទៅកាន់ខ្លួនឯងបានហើយ។

ហើយនេះជាអ្វីដែលបន្ថែមគឺ យកគោលដៅទាំងនោះទៅដាក់ ឬបិទកន្លែងណាដែលអ្នកអាចឃើញញឹកញាប់បំផុត។ ព្យាយាម ខិតខំ ធ្វើអ្វីដែលជាគោលដៅរបស់អ្នក។ ចំណាយពេលខ្លះស្រមៃថា អ្នកបានក្លាយទៅជាមនុស្សចាស់ម្នាក់ បន្ទាប់មកក្រលេកមើលស្ថានភាពបច្ចុប្បន្ននេះវិញ។ ហើយសួរខ្លួនឯងថា តើវាមានភាពឈឺចាប់ទេ នៅពេលដែលអ្នកមិនអាចសម្រេចគោលដៅទាំងអស់នេះបាន?

អរគុណ​សម្រាប់ការចំណាយ​ពេលវេលា​ក្នុង​ការ​អាន​ !!!